有人辭官歸故里，有人漏夜趕科場….
正當我傻裡傻氣、孤單感慨地係呢度寫文章唉聲嘆氣，為文友們漸漸放棄至愛興趣寫作隱退封筆而婉惜痛心、我亦差不多被現實徹底打敗要傷心離場（咪誤會，係暫時離場隱居，專心寫小說）的時候，竟然有位作者朋友毅然決定自己搞出版社，出版自己想寫的書！
作者朋友本來是有出版社合約的，在香港出了幾本有版稅收的小說（未得同意，唔講得佢係邊個），不過，近月書市受金融海嘯影響，佢的書只能賣出不到三百本，出版社極不滿意而凍結佢的作品，使佢毅然提出解約決定，並且準備自立門戶搞一間細菌型、一腳踢晒的出版社（佢話見我搞得好過癮，自由自在，要試試喎），自己出自己的書（唔會幫人做自資出書），盡情出版最喜歡但市場比較窄的書，包括愛情小說、非常冷門的散文集、新詩集、兒童故事書等等。最主要，係佢唔需要靠版稅生活，寫作係佢最大的興趣，所以，佢無必要為雞碎咁多的版稅看編輯面色。
就算自己搞出版社會好辛苦亦要蝕本，佢都係義無反顧地去勇闖！
無有怕，有另一半的支持：經濟支持，精神支持，實際行動幫手幫腳來支持！
即使蝕錢，咪就當係去左星馬泰日玩左一轉囉，就當係出街食餐好的啦！
好！非常勇敢的朋友！既然你叫到我幫手，我就幫你 —
我幫你解說清清楚楚，一家出版社的運作情況，市場情況，要注意的現實，要面對的困難，要忍受的閒氣，做到嘔泡的行政文件工作，煩到想死的各種會計帳項，七國咁亂的物流協調，苦力般的儲存和出貨入貨搬運，還要擔心各種各樣想得到想不到和突如其來的風險，仲有呀，搵定個唔可以太細的地方去儲存賣唔出的書，等等等等，大盤大盤的冷水係咁潑係咁潑。
咦？竟然無 O 嘴，真係意志堅定、無有怕咁款喎。
佢話，仲有好多朋友包括編輯、排版、畫師等等出手幫佢，無有怕！
又有一家非常好的發行公司答應幫佢發書，更加無有怕。
係囉，仲有我呢個蠶蟲師爺教頭教路喎可……
既然決心咁大，我只能祝你好運，如果搞得掂的，日後考慮幫我出書得嘛？
當然啦，如果你有難題我又幫到的，唔使客氣，一定要搵我呀！
最後 —-
加 油 啊 ！ 祝 你 成 功 ！
瀏覽人次：2336
近期迴響